JOURNALIST കര്‍ണാടകയിലും തമിഴ്നാട്ടിലും കോവിഡ് വ്യാപനതോത് ഞെട്ടിയ്ക്കുന്ന രീതിയില്‍. തമിഴ്‌നാട്ടില്‍ ഇന്ന് മാത്രം എഴുനൂറ്റി പതിനാറ് കേസുകളാണ് പോസറ്റീവായത്. ഇതില്‍ 510 പേരും ചെന്നൈയിലാണ്. മരണസംഖ്യ ഉയരുന്നതും ചെനൈയെ ഭീതിയിലാഴ്ത്തുന്നു. ഇന്ന് എട്ടുപേരാണ് കോവിഡ് ബാധിച്ച് മരിച്ചത്.
കേരളാ അതിര്‍ത്തിയിലെ തേനിയില്‍ ഏഴുപേര്‍ക്ക് കോവിഡ് ബാധിച്ചു. വിരുത്നഗറിലും കന്യാകുമാരിയിലും പുതിയ കോവിഡ് കേസുകള്‍ സ്ഥിരീകരിച്ചിട്ടുണ്ട്.
ചെന്നൈയില്‍ പോലീസ് ഡെപ്യൂട്ടി കമ്മീഷണര്‍ക്കും അസിസ്റ്റന്റ് കമ്മീഷണര്‍ക്കും കോവിഡ് ബാധ സ്ഥിരീകരിച്ചിട്ടുണ്ട്. കണ്ണകി നഗറിലെ കോളനിയില്‍ 23 പേര്‍ക്ക് കോവിഡ് സ്ഥിരീകരിച്ചു. ചേരി നിവാസികളെ വര്‍ഷങ്ങള്‍ക്ക് മുമ്പ് മാറ്റിപ്പാര്‍പ്പിച്ച കണ്ണകി നഗറില്‍ അടുത്തടുത്ത കെട്ടിടങ്ങളിലായി ഇരുപതിനായിരത്തോളം പേര്‍ താമസിക്കുന്നുണ്ട്. ലോറി ഡ്രൈവര്‍ക്ക് കോവിഡ് സ്ഥിരീകരിച്ചതോടെ കുഭകോണത്തെ പച്ചക്കറി മാര്‍ക്കറ്റും അടച്ചു. ഈ ഡ്രൈവര്‍ മേട്ടുപ്പാളയത്ത് നിന്നാണ് ഉരുളക്കിഴങ്ങുമായി കുംഭകോണത്ത് എത്തിയത്.
കര്‍ണാടകയില്‍ ഇതുവരെ ഏറ്റവും കൂടുതല്‍ പേര്‍ക്ക് കോവിഡ് സ്ഥിരീകരിച്ച ദിവസമാണ് ഇന്ന്. 63 പുതിയ കേസുകളാണ് സ്ഥിരീകരിച്ചത്. ബലഗാവിയില്‍ കോവിഡ് രോഗം ഭേദമായ ആള്‍ക്ക് ഇന്ന് വീണ്ടും രോഗം സ്ഥിരീകരിച്ചത് ആരോഗ്യവകുപ്പിനെ ആശങ്കയിലാക്കുന്നു. കര്‍ണാടകയില്‍ ഗ്രീന്‍ സോണിലായിരുന്ന ജില്ലകളില്‍ മിക്കതും റെഡ്‌സോണിലേക്ക് മാറുകയാണ്.
ആന്ധ്രാപ്രദേശില്‍ ഇന്ന് ഒരാള്‍ കോവിഡ് ബാധിച്ച് മരിച്ചു. 24 മണിക്കൂറിനിടെ 33 പേര്‍ക്ക് കോവിഡ് ബാധിച്ചു. തെലങ്കാനയില്‍ 14 ഇതര സംസ്ഥാനത്തൊഴിലാളികള്‍ ഉള്‍പ്പെടെ 51 ആളുകള്‍ക്ക് കൂടി കോവിഡ് സ്ഥിരീകരിച്ചു. തെലങ്കാനയില്‍ ഇതുവരെ 24 ഇതര സംസ്ഥാനത്തൊഴിലാളികള്‍ക്ക് കോവിഡ് ബാധിച്ചിട്ടുണ്ട്. ലോക്ക്ഡൗണില്‍ കൂടുതല്‍ ഇളവ് ലഭിച്ചതിനനുസരിച്ച കോവിഡ് ബാധിതരുടെ എണ്ണം വര്‍ദ്ധിക്കുന്ന കാഴ്ചയാണ് കേരളം ഒഴികെയുള്ള എല്ലാ ദക്ഷിണേന്ത്യന്‍ സംസ്ഥാനങ്ങളിലും കാണുന്നത്.
